Tiger 3: સક્સેસ પાર્ટીમાં સલમાન ખાન અને ઈમરાન હાશ્મીના કિસિંગ સીનથી ફેલાઈ રમૂજ

સલમાન ખાને ઈમરાનને કિસ કર્યા બાદ કહ્યું કે, તેની આ આદત નવી છે પરંતુ ઈમરાનની આદત છૂટી રહી હોવાનું લાગી રહ્યું છે

Last Updated : 18 November 2023, 02:51 PM IST

Courtesy: Image: Twitter

Tiger 3: સલમાન ખાનની એક્શન થ્રિલર ફિલ્મ ટાઈગર 3 (Tiger 3) બોક્સ ઓફિસ પર ધમાલ મચાવી રહી છે. આ ફિલ્મમાં સલમાનની સાથે કેટરિના કૈફ અને ઈમરાન હાશ્મી મુખ્ય ભૂમિકામાં જોવા મળી રહ્યા છે. 12 નવેમ્બરના રોજ રીલિઝ થયેલી આ ફિલ્મે ભારતમાંથી 200 કરોડ રૂપિયા અને વિશ્વભરમાંથી 300 કરોડ રૂપિયાની કમાણી કરી છે.

તાજેતરમાં મુંબઈ ખાતે ટાઈગર 3ની સક્સેસ મીટ યોજાઈ હતી. મેકર્સ દ્વારા યોજવામાં આવેલી આ ઈવેન્ટમાં સલમાન, કેટરિના અને ઈમરાને ઓડિયન્સ સાથે ખુલીને મસ્તી કરી હતી. આ ઈવેન્ટના અનેક ફોટોઝ અને વીડિયો સોશિયલ મીડિયામાં વાયરલ થઈ રહ્યા છે.

Tiger 3ની સક્સેસ પાર્ટીમાં ભાઈજાનનો કિસિંગ સીન

ઈવેન્ટ દરમિયાન સલમાને જણાવ્યું હતું કે, ફિલ્મમાં કેટરિના છે એટલે થોડો રોમાન્સ તો હોવાનો જ. ત્યાર બાદ સલમાન ખાને ઈમરાન હાશ્મી તરફ જોઈને કહ્યું હતું કે, જો ફિલ્મમાં ઈમરાનનો રોલ આતિશ તરીકેનો ના હોત તો આવું બની જાત... આમ કહીને સલમાન ખાન આગળ વધીને ઈમરાન હાશ્મીને લિપકિસની એક્ટિંગ કરવા લાગે છે. ઉલ્લેખનીય છે કે, ઈમરાન હાશ્મીએ બોલિવુડમાં સીરિયલ કિસર તરીકેની ઈમેજ બનાવી હતી.

ટાઈગર 3 (Tiger 3)ની પાર્ટીમાં સલમાન ખાનની આ હરકત જોઈને કેટરિના કૈફ ઉપરાંત ત્યાં હાજર સૌ કોઈ હસવા લાગ્યા હતા. ઈવેન્ટ દરમિયાન સલમાન ખાન ખૂબ જ મસ્તીના મૂડમાં હતો અને તેણે કેટરિના કૈફ અને ઈમરાન હાશ્મીના પગ ખેંચવાની કોઈ તક જતી નહોતી કરી.

એક ક્લિપમાં સલમાનને ટાઈગર-ઝોયાના ઓન-સ્ક્રીન જાદુ પાછળનું રહસ્ય પૂછવામાં આવ્યું હતું. ત્યારે તેણે કહ્યું હતું કે, “જો કેટરિના હશે તો ચોક્કસ રોમાંસ થશે. અને જો ઈમરાનનો રોલ આતિશનો ન હોત, તો હું તમને ખાતરી આપું છું કે આવું થયું હોત.” આ વાક્ય પૂરું કરતાંની સાથે જ તે ઈમરાન સાથે કિસિંગ સીન કરતો જોવા મળ્યો હતો.

ઉપરાંત વીડિયોમાં સલમાન આગળ એમ કહેતા સંભળાયો હતો કે, મારી આદત નવી છે, પરંતુ લાગે છે કે તેમની આ આદત તૂટી રહી છે. લુકની વાત કરીએ તો સલમાન ખાને ઈવેન્ટમાં બ્લુ ટીશર્ટ પહેરી હતી જ્યારે ટાઈગર 3 (Tiger 3)ની ઈવેન્ટમાં કેટરિના કૈફ પીળા રંગના સુંદર ડ્રેસમાં જોવા મળી હતી. ઈમરાન હાશ્મી પેન્ટ સાથે ગ્રે ટી-શર્ટમાં ખૂબ જ હેન્ડસમ લાગી રહ્યો હતો.

ઈમરામ હાશ્મી વિલનની ભૂમિકામાં

તમને જણાવી દઈએ કે, ટાઈગર 3માં સલમાન ખાન અને કેટરિના કૈફ ફરી એકવાર રો એજન્ટના રોલમાં દમદાર એક્શન કરતા જોવા મળ્યા છે. આ વખતે ફિલ્મમાં ઈમરાન હાશ્મીની પણ એન્ટ્રી થઈ છે. જે વિલનના રોલમાં હંગામો મચાવી રહ્યો છે. ચાહકો પણ આ ત્રણેયને ખૂબ પસંદ કરી રહ્યા છે. આ ઉપરાંત શાહરુખ ખાનના કેમિયોની પણ પ્રશંસા થઈ રહી છે.

Tags :