ઈરાન-પાકિસ્તાન વચ્ચે આગળ શું થઈ શકે? જાણો ભારતે શા માટે રાખવી જોઈએ નજર?

પાકિસ્તાન અને ઈરાન વચ્ચે તણાવ ચરમસીમા પર છે. બંને દેશોએ એકબીજાની ધરતી પર આતંકવાદીઓ પર હુમલાનો દાવો કર્યો છે. આ હુમલાઓમાં ઘણા લોકોના મોત થયા છે.

ઈસ્લામાબાદ: ઈરાન અને પાકિસ્તાન બંનેએ એકબીજાની ધરતી પર આતંકવાદીઓ પર હુમલાનો દાવો કર્યો છે. જો કે, બંને દેશોએ પોતપોતાના પ્રદેશો પર હવાઈ હુમલાનો વિરોધ કર્યો હતો અને તેમના પર નાગરિકોની હત્યાનો આરોપ પણ લગાવ્યો હતો. આવી ઘટનાઓ બાદથી બંને દેશો વચ્ચે તણાવ ઉચ્ચ સ્તરે છે. જ્યાં પાકિસ્તાને પોતાના રાજદૂતને પરત બોલાવ્યા છે, ત્યારે ઈરાને પાકિસ્તાની રાજદ્વારીને બોલાવીને ઉગ્ર વિરોધ વ્યક્ત કર્યો છે. એવી આશંકા છે કે તાજેતરના હુમલાઓ પાકિસ્તાન અને ઈરાન વચ્ચે વ્યાપક સંઘર્ષમાં પરિણમી શકે છે, જે પહેલાથી જ અસ્થિર પશ્ચિમ એશિયામાં વધુ તણાવ વધારી શકે છે. આવી સ્થિતિમાં સવાલો ઉઠી રહ્યા છે કે જો ઈરાન અને પાકિસ્તાન વચ્ચે વ્યાપક સંઘર્ષ થશે તો તેની શું અસર થશે અને શું ભારતે ચિંતા કરવી જોઈએ?

શું છે ઈરાન અને પાકિસ્તાનના આરોપ
ઈરાન અને પાકિસ્તાન લાંબા સમયથી એકબીજા પર કેટલાક આતંકવાદી જૂથોને સમર્થન આપવાનો અથવા તેમને પોતપોતાના પ્રદેશોમાં કામ કરવા દેવાનો આરોપ લગાવી રહ્યા છે. રિપોર્ટ અનુસાર, આ બળવાખોરો સેના કે નાગરિકોને નિશાન બનાવ્યા બાદ અન્ય દેશોની સરહદો તરફ ભાગી જાય છે. જેના કારણે તેમને પકડવા મુશ્કેલ બની જાય છે. ઇરાને મંગળવારે જે સુન્ની અલગતાવાદી જૂથ જૈશ અલ-અદલ (ન્યાયની સેના)ને નિશાન બનાવ્યું હતું તે પાકિસ્તાનમાં સ્થિત હોવાનું માનવામાં આવે છે. સિસ્તાન અને બલુચિસ્તાન પ્રાંતની આઝાદીની માંગણી કરતું આતંકવાદી જૂથ ઈરાની સુરક્ષા દળોને નિશાન બનાવવા માટે જાણીતું છે.

આની ભારત પર શું અસર થઈ શકે?
પાકિસ્તાન સાથે ભારતના સંબંધો ખાસ કરીને 2019ના પુલવામા હુમલા બાદ તણાવગ્રસ્ત છે. બીજી તરફ, નવી દિલ્હીએ છેલ્લા કેટલાક દાયકાઓમાં ઈરાન સાથે સારા સંબંધો જાળવી રાખ્યા છે. ભારત-ઈરાન સંબંધોને પાકિસ્તાનમાં ચિંતાની નજરે જોવામાં આવે છે. પાકિસ્તાન પર ઈરાનના હુમલા બાદ વિદેશ મંત્રાલયે બુધવારે પ્રતિક્રિયા આપતા કહ્યું કે આ બંને દેશો વચ્ચેનો મામલો છે. જો કે, નવી દિલ્હીએ એમ પણ કહ્યું હતું કે તે "સ્વ-રક્ષણમાં દેશો દ્વારા લેવામાં આવતી કાર્યવાહી" સમજે છે. વ્યૂહાત્મક બાબતોના નિષ્ણાત સી રાજા મોહનના જણાવ્યા અનુસાર, ભારત માટે ઈરાનને સમર્થન આપવું "સ્વાભાવિક" હતું કારણ કે નવી દિલ્હીએ 2019માં પાકિસ્તાનની અંદર સર્જિકલ સ્ટ્રાઈક કર્યા પછી સમાન સમર્થન આપ્યું હતું.

પશ્ચિમ એશિયામાં અસ્થિરતાના કારણે ભારતને નુકસાન
પશ્ચિમ એશિયામાં અસ્થિરતા એ ભારત માટે પણ ચિંતાનો વિષય છે, જે આ પ્રદેશ, ખાસ કરીને સાઉદી અરેબિયા અને ઇરાકમાંથી ઇંધણના શિપમેન્ટ પર ખૂબ નિર્ભર છે. અરબી સમુદ્રમાં તેના શિપિંગને નિશાન બનાવવાથી ભારતના વ્યાપારી હિતોને ખતરો છે. વધુ હુમલાને રોકવા માટે નવી દિલ્હીએ પહેલાથી જ યુદ્ધ જહાજો તૈનાત કરી દીધા છે. યુરોપ સાથે ભારતનો લગભગ 80 ટકા માલ વેપાર, જે દર મહિને આશરે $14 બિલિયન જેટલો છે, સામાન્ય રીતે લાલ સમુદ્રમાંથી પસાર થાય છે. ટાઈમ્સ ઓફ ઈન્ડિયા અનુસાર, ભારત આ માર્ગ દ્વારા અમેરિકાના ઈસ્ટ કોસ્ટ, આફ્રિકા અને પશ્ચિમ એશિયામાં પણ સામાન મોકલે છે. ગલ્ફમાં ચીનનો વધતો પ્રભાવ અને બલૂચિસ્તાનમાં તેની હાજરી ભારત માટે અન્ય કેટલીક ચિંતાઓ છે.

• 

  Ahmedabad Civil Hospital: બાળકો માટે યોજાશે

  Gujarat

• 

  અફઘાનિસ્તાનમાં પેસેન્જર પ્લેન ક્રેશ, મોસ્કો જઈ રહેલું પ્લેન રસ્તો ભટકી ગયું... વાંચો વિગતો

  International

• 

  પાકિસ્તાની 'લાલ ટોપી'એ ઈરાનને ગાઝામાં ફેરવવાની ધમકી આપી.. ભારત વિરુદ્ધ ઓક્યું ઝેર

  International

• 

  Ayodhya: 22મીએ રામ લલ્લાની પ્રાણપ્રતિષ્ઠા કડકડતી ઠંડીમાં

  India

• 

  Pak VS Iran: જવાબી હુમલામાં પાકે. ઈરાન પર કરી એરસ્ટ્રાઈક, આતંકી ઠેકાણાઓને કર્યા ટાર્ગેટ

  International