જન્માષ્ટમીના અવસરે ઘરે જ દૂધની આ 3 મીઠાઈ બનાવીને બાળ ગોપાલને ભોગ ધરાવો

બાળગોપાલની લીલા સાથે દૂધ, માખણ પણ જોડાયેલા જ છે માટે દૂધની મીઠાઈ બનાવીને જન્માષ્ટમી પર તમે શ્રીકૃષ્ણને પ્રિય ભોગ તૈયાર કરી શકો છો. મખાના ખીરઃ દૂધ પેંડાઃ માલપુઆઃ ઉપર જણાવેલા સ્ટેપ્સનો ઉપયોગ કરીને તમે ઘરે જ મીઠાઈ બનાવી કાન્હાને ભોગ ધરાવી શકો છો. તમારા સ્વાદ અને પસંદ પ્રમાણે તમે ફેરફાર કરી શકો છો.

Last Updated : 07 September 2023, 05:16 AM IST

બાળગોપાલની લીલા સાથે દૂધ, માખણ પણ જોડાયેલા જ છે માટે દૂધની મીઠાઈ બનાવીને જન્માષ્ટમી પર તમે શ્રીકૃષ્ણને પ્રિય ભોગ તૈયાર કરી શકો છો.

મખાના ખીરઃ

એક પેનમાં એક ટીસ્પૂન ઘી ગરમ કરો અને તેમાં 1-1 ટેબલ સ્પૂન કાજુ-બદામની કતરણ ઉમેરી તેને શેકો. કાજુ-બદામ હળવા સોનેરી રંગના થવા લાગે એટલે તેમાં 1 ટેબલ સ્પૂન કિસમિસ ઉમેરો અને કિસમિસ ફુલાઈ જાય એટલે ગેસ બંધ કરી દો.
હવે એક ટીસ્પૂન ઘીમાં 2 કપ મખાનાને 2-3 મિનિટ માટે શેકો અને ઠંડા પડે એટલે તેમાંથી 1.5 કપ મખાનાને મિક્સરમાં પીસીને પાવડર બનાવી દો. (તમે 1 કપ કે તેથી ઓછા મખાનાનો પણ પાવડર બનાવી શકો છો)
1 લીટર ઉકાળેલા દૂધને બાકીના અડધા કપ મખાના સાથે 5 મિનિટ માટે ફરી ઉકાળો અને તેમાં ધીમે-ધીમે મખાનાનો પાવડર ઉમેરો. આ મિશ્રણને તમને યોગ્ય લાગે એટલું ઘટ્ટ થવા દો અને પછી તેમાં શેકેલા કાજુ, બદામ, કિસમિસ ઉમેરો અને વધુ 2-3 મિનિટ માટે ગરમ થવા દો.
છેલ્લે દૂધ અને મખાનાના મિશ્રણમાં 1/4 કપ ખાંડ અને 1/2 ટીસ્પૂન ઈલાયચી પાવડર ઉમેરીને 2-3 મિનિટ માટે ગરમ કરો અને થોડા વધુ કાજુ-બદામ વડે સુશોભિત કરીને ગરમ કે ઠંડુ ધરાવો.

દૂધ પેંડાઃ

જાડા તળિયાવાળા સોસપેનમાં 2 લીટર ફુલ ક્રીમવાળા દૂધને ઉંચા તાપમાને ગરમ કરો. દૂધનું પ્રમાણ અડધું થઈ જાય અને તે કણીદાર બની જાય ત્યાં સુધી હલાવતા રહીને ચોંટે નહીં તે રીતે ગરમ કરો.
વાસણની બાજુમાં દૂધની મલાઈ ચોંટે તેને ઉખાડીને દૂધમાં ઉમેરતા રહેવું. દૂધ કણીદાર માવા જેવું બનવા લાગે એટલે તેમાં એક કપ ખાંડ અને એક ટીસ્પૂન ઈલાયચી પાવડર ઉમેરી ધીમા તાપે 5-8 મિનિટ માટે હલાવતા રહીને ઘટ્ટ બને ત્યાં સુધી ગરમ કરો.
બાદમાં ગેસ બંધ કરી અન્ય વાસણમાં ઠારી લો અને પછી ઘીવાળા હાથ કરીને મનગમતા આકારના પેંડા વાળી લો.

માલપુઆઃ

એક વાસણમાં 1 કપ મેંદો લઈને તેમાં ગાંઠ ન વળે તેમ ધીમે-ધીમે 1.5 કપ દૂધ ઉમેરો. તેમાં એક ટીસ્પૂન ઈલાયચી પાવડર, 1 ટેબલ સ્પૂન કિસમિસ અને એક ટેબલ સ્પૂન સૂકા નાળિયેરનું છીણ ઉમેરી અડધા કલાક માટે બાજુ પર રાખી દો. (1/2 ટીસ્પૂન વરિયાળીનો ભૂકો અને 1 ટેબલ સ્પૂન કાજુનો ભૂકો પણ ઉમેરી શકાય)
અન્ય એક વાસણમાં 3 કપ પાણી અને 2 કપ ખાંડની ચાસણી બનાવવાનું શરૂ કરો.
ચાસણી તૈયાર થઈ જાય એટલે ગેસ બંધ કરી તેમાં 4 ઈલાયચીનો ભૂકો ઉમેરો અને સ્વાદ-રંગ માટે કેસર પણ ઉમેરી શકાય.
માલપુઆનું ખીરૂ તૈયાર થઈ જાય એટલે ગરમાગરમ તેલમાં એક ચમચો ખીરૂ રેડીને તેને બંને બાજુ સોનેરી રંગ આવે ત્યાં સુધી તળો.
માલપુઆ વચ્ચેથી ગોલ્ડન બ્રાઉન અને છેડેથી હળવા બદામી રંગના દેખાય એટલે તૈયાર સમજો. ત્યાર બાદ તેને ગરમાગરમ જ ચાસણીમાં ડૂબાડીને ભોગ તૈયાર કરો.

ઉપર જણાવેલા સ્ટેપ્સનો ઉપયોગ કરીને તમે ઘરે જ મીઠાઈ બનાવી કાન્હાને ભોગ ધરાવી શકો છો. તમારા સ્વાદ અને પસંદ પ્રમાણે તમે ફેરફાર કરી શકો છો.

Tags :